2Ch 1 | NdeIBE | STEP | USolomoni indodana kaDavida waqina embusweni wakhe, ngoba uJehova uNkulunkulu wakhe wayelaye njalo wamenza waba mkhulu kakhulu.

2 Chronicles 1

USolomoni Ucela Inhlakanipho

1 USolomoni indodana kaDavida waqina embusweni wakhe, ngoba uJehova uNkulunkulu wakhe wayelaye njalo wamenza waba mkhulu kakhulu.

2 Kwathi uSolomoni wakhuluma kubo bonke abako-Israyeli – kusukela kubalawuli bezinkulungwane labalawuli bamakhulu, kusiya kubehluleli lakubo bonke abakhokheli bako-Israyeli, abayizinhloko zezimuli – 3 kwaze kwathi yena uSolomoni lebandla lonke baya endaweni yokukhonzela eGibheyoni, njengoba iThente lokuHlanganela likaNkulunkulu, elalenziwe nguMosi inceku kaJehova enkangala lalikuleyondawo. 4 UDavida wayeselethe ibhokisi lesivumelwano sikaNkulunkulu lisuka eKhiriyathi Jeyarimi elisa endaweni ayelilungisele yona, ngoba wayeselimisele ithente eJerusalema. 5 Kodwa i-alithare lethusi elalakhiwe nguBhezaleli indodana ka-Uri, indodana kaHuri, laliseGibheyoni phambi kwethabanikeli likaJehova; ngakho uSolomoni lebandla lonke bahamba ukuyafuna intando kaNkulunkulu khona. 6 USolomoni wasesiya ealithareni lethusi phambi kukaJehova eThenteni lokuHlanganela wafika wanikela iminikelo yokutshiswa eyinkulungwane phezu kwalo.

7 Ngalobobusuku uNkulunkulu wabonakala kuSolomoni wathi kuye: “Cela loba kuyini okufunayo ukuze ngikunike khona.”

8 USolomoni ephendula uNkulunkulu wathi: “Utshengisile umusa omkhulu kakhulu kubaba uDavida njalo mina usungibeke ngaba yinkosi esikhundleni sakhe. 9 Ngakho, Jehova, uNkulunkulu, gcwalisa isithembiso owasenza kubaba uDavida, ngoba ungenze inkosi phezu kwabantu abanengi okothuli lomhlabathi.

10 Nginika ukuhlakanipha lolwazi, ukuze ngikhokhele lababantu, ngoba ngubani ongabusa abantu bakho abaqakatheke kangaka?”

11 UNkulunkulu wathi kuSolomoni, “Njengoba lesi kuyisifiso somoya wakho njalo kawucelanga impahla lenotho lodumo, lokubhubha kwalabo abakuzondayo, lokuthi awucelanga impilo ende kodwa ucele inhlakanipho lolwazi ukuze ubuse phezu kwabantu bami engikwenze waba yinkosi yabo,

12 ngenxa yalokho ngizakunika inhlakanipho lolwazi. Njalo ngizakunika impahla, lenotho lodumo, okungakaze kwenzakale emakhosini akwandulelayo njalo akuyikwenzakala lakumakhosi alandelayo.”

13 Ngakho uSolomoni waya eJerusalema esuka endaweni yokukhonzela eGibheyoni, evela phambi kweThente lokuHlanganela. Wabusa phezu kuka-Israyeli.

14 USolomoni wabuthanisa izinqola zokulwa lamabhiza; wayelezinqola zokulwa ezingamakhulu alitshumi lane lamabhiza ayizinkulungwane ezilitshumi lambili, ayekugcina emizini yezinqola zezimpi okunye ekugcina yena eJerusalema. 15 UJehova wandisa isiliva legolide eJerusalema kwangathi ngamatshe, kwathi lomsedari wanda kwangathi ngumkhiwane wohlobo lwesikhamore emawatheni ezintaba.

16 Amabhiza kaSolomoni ayevela eGibhithe amanye avela eKhuwe – abathengi benkosi babewathenga eKhuwe. 17 Bathenga inqola yokulwa eGibhithe ngamashekeli esiliva angamakhulu ayisithupha, lebhiza ngekhulu elilamatshumi amahlanu. Ngokunjalo abathengi benkosi bawathengisela lamakhosi amaHithi lawama-Aramu.